تيتا ♥♥

وجودك كفاية

حكاياتك اللي بتحكيها
وسؤالك عليا كفاية


مع إنك ديما تنسى
وتعيدى الكلام كذا مرة

سامحينى مش بقدر اركز
وبتوه ف عينيكى وملامحك

تجعيد وشك بتطمني
وبتعلمني
وبتفهمنى

إن الحياة مهما كانت مره
نقدر نفضل جمال

وبفرح لما الاقى فيا ملامح منك
أنا أخده عيونك ع فكرا :)


سامحينى لأنى بقصر
وبغيب كتير أنا عارفة

ابتسمتك اول ما تشوفينى
طبطبتك عليا
وتفضلى ماسكه ايدى

انتى عارفة يا تيتا
مفيش حد بيمسك اديا كده غيرك♥♥



تيتا♥♥
انتى اجمل كائن موجود ف الدونيا

♥

مفيش أحلى من إنك تحس إن اللي بتحبهم بيحبوك

اللهم  ادمهم نعمة ♥♥♥

التزييف

عارفين الفرق بين إنك تحب .. أو تعيش دور اللي بيحب
إنك تزعل .. أو تعيش دور الحزين
إنك تكون موهوب .. وبين إنك تعيش دور الفنان بقي

الفرق بين الضحكة والابتسامة
الفرق بين الدموع أو الوجع اللي أكبر منها

طب جربت في يوم تعيش دور المبسوط
عشان محدش هيفهم أو يقدر
أو انت ببساطة مش عايز نظرة شفقة من حد

جربت تعيش دور الحزين
عشان تشوف نظرة اهتمام أو حنية
تحسسك إنك موجود

طب عمرك أختارت تعيش دور إنك متفاجئ
مع إنك عارف اللى هيحصل

أو الدور اللى ولا همه
مع إن ديه أخر حاجة ممكن تيجي ع بالك

فاكر أول ما كنت بتبان شجاع
مع إن الخوف مليك

أو اليوم اللي بينت فية خوفك
عشان حد يمسك ايدك ويطمنك

باختصار .. عمرك جربت تعيش دور إنك عايش!!؟

هو احنا ممكن في يوم نكون بمشاعرنا الحقيقة من غير أى تزيف
من غير تمثيل
ومن غير مبالغة


مشاعر حقيقة شفافة